كلمات من مات أبوي وكل شيٍ تحطم:
من مات أبوي وكل شيٍ تحطم
إلا الرثا والحزن وجو الكآبه
عاشت معي حتى بديت أتألم
كثر الفراق اللي ترك له صبابه
لا من ذكرت الرمس والقبر الأظلم
أقول يا ربي عليه بسحابه
أبوي عبدك وأنت الأكرم والأعلم
رحمتك يا ربي تخفف حسابه
مؤمن تجنّب كل شيٍ محرم
يعمل بما قال النبي والصحابه
يسجد لوجهك ويتهجد ويعلم
إن البشر تعجز تَخَلَّق الذبابه
وإن العمر مهما قصر او تقدم
مردّنا للي حفظنا كتابه
ومن عقبه افعاله هي اللي تكلم
ما هو بحاجه مدح وإلا ذرابه
يجمع مع الدين الكرم ونتعلم
كيف المراجل تنحني عند بابه
أنا أشهد ان الكون في العين ظلم
حتى الأمل ما باقي إلا سرابه
يا ليت موت أبوي جاني وأنا أحلم
ولا وضعني هالزمن تحت نابه
