كلمات اغنية مصر ياما يا سفينة
يسبق كلامنا سلامنا يطوف ع السامعين معنا
عصفور محندق يزقزق كلام موزون و له معنى
عن ارض سمرا و قمرا
وضفه و نهر و مراكب
ورفاق مسيرة عسيرة
وصورة حشد ومواكب
ف عيون صبية بهية
عليها الكلمة و المعنى
مصر يا امّة يا بهية
يام طرحة و جلابية
الزمن شاب وانت شابة
هو رايح وانت جاية
جايه فوق الصعب ماشية
فات عليكي ليل ومية
واحتمالك هو هو
وابتسامتك هي هي
تضحكي للصبح يصبح
بعد ليلة ومغربية
تطلع الشمس تلاقيكي
معجبانية وصبية
يا بهية
الليل جزاير جزاير يمد البحر يفنيها
والفجر شعلة ح تعلا وعمر الموج ما يطويها
والشط باين مداين عليها الشمس طوافة
ايدك في ايدنا ساعدنا دي مهما الموجة تتعافى
بالعزم ساعة جماعة وبالأنصاف نخطيها
مصر يا امّة يا سفينة
مهما كان البحر عاتي
فلاحينك ملاحينك
يزعقوا للريح يواتي
اللي ع الدفة صنايعي
و اللي ع المجداف زناتي
واللي فوق الصاري شايف
كل ماضي و كل آتي
عقدتين و التالته تابتة
تركبي الموجة العفية
توصلي بر السلامة
معجبانية و صبية.. يا بهية
ويعود كلامنا في سلامنا يطوف ع الصحبة حلواني
عصفور محني يغني على الأفراح ومن تاني
يرمي الغناوي تقاوي تبوس الأرض
تتحنى
تفرح
وتطرح
وتسرح
وترجع تاني تتغنى
اللي بنى مصر كان في الأصل حلواني
